• Accueil
  • > Archives pour septembre 2009

“Amounen” amud n tullisin

Posté par algeriedemocratie le 1 septembre 2009

“Amounen” amud n tullisinsɣur Ait Slimane Hamid“Amounen” amud n tullisin dans tamazight(65) 2210_75388

“Amounen”, d yiwen n wamud n tullisin i d-yura Mass Ait Slimane Hamid, i d-yeffɣen deg waggur n meɣres yezrin sɣur tizrigin Oasis des artistes di tmurt n Fransa. Deg wamud-agi, Hamid s tira-s yesrezfaɣ seg tullist ɣer tayeḍ ɣer yixef n umdan, akken ad yessentu tayri deg yimdanen merra. Ad naf taqṣit n yilemẓi, iḥeḍren i uɣḍal n lḥerma n yiwet n tlemẓit deg uzal qayli, d ayen ara izerεen deg wul-is rrihban meqqren. Ad nerzu ɣef tmurt n lxali, s sebba n yimezdaɣen-is i yemsengaren gar-asen almi kra yellan din, yuɣal d asafer. Ad teḥyu tmurt-agi s yifaden n tayri akked d imeṭṭi n tmeṭṭut. Syin, ad aɣ-yessemlil d Racid akked Mirḍa yemmiḥmalen s ttawil n lantirnet almi d ass ideg adabu n tmurt yekkes allal-agi. Mass Hamid Ait Slimane, ad aɣ-yawi ɣer yiseggasen yeẓrin, akken ad aɣ-d-yemmeslay ɣef yicennayen igrawliyen am Slimane Azem akked Ahmed Saber ihuzen ixef-is asmi i t-yuɣ lḥal deg temdint n Mestɣanem.  “Amounen” d tamacahut n yiwen n llufan i d-yesserwal baba-s akked d yemma-s seg yir tawenza i t-yeggunin di teɣremt n yirabiten i d yettbanen d ljennet uqbel ad tekfel tidet. Deg tullist-nniḍen ad nissin tadyant n yimdanen i iɣunfan tafekka-nsen, almi i tt-ḍeqqren akkin, acku d agdud wer aẓar wer timadit ! “Timursaḍ” d yiwet n tullist i d-yettmeslayen ɣef lxuf zdat tmeṭṭut i d-yewwin tuttra lqayen : « ayen ẓẓur i d-yeɣlin ɣef tullas, amek ara tidir tayri deg liḥala yecban ta ? » Ad yekfu udlis s tlata n teqṣiḍin tiwezzlanin, i d-yemmalen azal n tayri yellan d afud yettawin amdan ɣer yixef-is. Am wakken i d-tenna Massa Clo Valerie yeggan tazwart i udlis-agi : « deg wamud-agi n tullisin yura Mass Ait Slimane Hamid, seg wawal amezwaru almi d uneggaru, ala tayri akked d telqay n tidmi i d-nettmagar, kra yuran d asiwel i leḥmala gar yimdanen merra deg umaḍal. »

Ɛerqub Ɛebdella

source:dépêche de kabylie

Publié dans tamazight(65) | Pas de Commentaire »

Hmed Lala : Tawaract n ymedyazt

Posté par algeriedemocratie le 1 septembre 2009

Hmed Lala : Tawaract n ymedyaztHmed Lala : Tawaract n ymedyazt dans tamazight(65) 2210_75390

“Tamedyazt d twaract-is” d ammud i d-yeffɣen ɣer teẓrigin Aframed, deg useggas 2009, i d-yura Ḥmed Lala.

« Asefru bdiɣ-t d aleqqaq,

llmeɣ-d d arqaq,…,

ttleɣ-t jemɛeɣ-t d inzan. »

Asewzer-a, d tisukkest deg tmedyazt i yura Ḥmed Lala. Ur yuḥwağ yiwen ad isiɣzef awal akken ad yefhem acu yellan daxel-is. Ta i d ṭṭbiɛa n umedyaz. Ur yeḥmil asuget n wawal.

Ḥmed Lala, ilul deg waggur n yulyu, aseggas 1967, d mmi-s n taddart Tiwririn, yezgan deg tɣiwant Ifnayen. Yeqdec aṭas deg tdukliwin. Ayen akk yesla, d wayen akk yeɣra ama s teqbaylit ama s tefransist, yenğer-as-d abrid ɣer usefru.

Ammud “Tamedyazt d twaract-is” yebḍa ɣef tlata yiḥricen. Aḥric amezwaru yeɛna tamedyazt. Ma d wiyaḍ bḍan ɣef yinzan d temseɛraq. Isental iɣef i d-yessefra Ḥmed ggten. Seg beṭṭu yerra ɣer tdukli ; seg tayri ɣer yir tagmatt, … Deg tira yeffi-d tamedyazt s uɣanib d amaynut. Tin yefkan azal meqqer i lɛaddat tiqbayliyin akked ugama s umata (ulli, ṭṭbiɛa, asuki, argul, tirrugza, zzit, …)

Deg uḥric yeɛnan tamedyazt, yefti armi d usebter 54. Ḥmed Lala ileqqem-d awal fessus, yeshel i twaṭṭfa yerna-yas-d kra n useḍs. Yura-d tijmilin akken i d-yerna ɣef ccbaḥa n tayri :

« Teğğa-kem-d s lqedd,

D wallen cbant lhend. » 

Syin yuɣal ɣer lecɣal i d-yezzin. Am wučči, lɛaddat, lqerḥ, lferḥ, … akken i d-yura ɣef leɛtab n lmal. Am tyaziṭ :

« Xas d yennanyer,

Tayaziṭ tbekker

Teẓẓul lefjer. »

Neɣ ɣef yimɣan :

« Asmi yesɛa uqerquc lğar

yeɣli-d deg wayyur n sebɛa.

Azezzu yedda-d d inebgi

D aqeffaf s wafriwen. »

Ḥmed ur yettu ad d-yessefru ɣef tnekriwin d yimenkaren :

« …

Uzzlen yidammen yilemẓi

Yewwi-d la démocratie. (tuber 88) »

« …

Gezmen aseklu s ucaqur

Nnan-d yettarra-d tili. (Matub) »

Γef uḥric yizlan, yes-sen amedyaz yerba-d izlan ɣer yizlan. Yebɣa ad d-yerr lɛaddat n zik, anda medden sefrayen, ttmeslayen s lemɛun :

« Aɛrus d ufekrun ɣef tmezduɣt heddren ;

Lqeḍ azemmur qbel uẓerzur ;

Rray ma yebḍa ɣef sin, ansa i s-d-tekkiḍ mačči syin. »

Ḥmed yezdeɣ deg tzeqqa asnulfu. Γas akken yenna deg yizli : « Yebɣa ad iferfer am lbaz, s wafriwen warẓaẓ ». Netta ixemmem yufeg s lecɣal s wafriwen n lbaz, akken ad d-yefk tiktiwin s tament n tzizwa. Yuzen-d tilufa s tektiwin timaynutin i tɣawsiwin tiqburin neɣ timiranin.

Akken daɣen i d-isellek kra wawalen seg tatut. Wid yebdan ttɣiben acku ur ten-nesseqdac ara aṭas. Gar-asen llan (cetfu/ccah, herwet/zleɛbeḍ, uɛqim/yettwaɣ…)

Deg wammud “tamedyazt d twaract-is”, nwala Ḥmed ur icuḥ ara deg usnulfu. Ayen akk sway iḥulfa, yesnufa-d fell-as. Iṭerreẓ-as-d awal i d-yurwen tamedyazt neɣ inzan.

Ait Ighil Mohand

source:dépêche de kabylie

Publié dans tamazight(65) | Pas de Commentaire »

Ussan n remdan

Posté par algeriedemocratie le 1 septembre 2009

Ussan n remdanΓas wali iman-ik ɣer lemri !Ussan n remdan dans tamazight(65) 2210_75372

“Saḥa fṭourek” ɣef 8, tasebḥit deg wlelli ; imawen fuḥen, ɣurek ad taẓeḍ ; ḥed ur yettruẓ di nnmara-s, am nnmara n uzrem deg lkanun ; imennuɣen, la ttnaɣen ɣef uqerruy n tsegnit. Meɛna d ussan n remḍan, mesmuḥet !

Akka i d ussan n remḍan. Asawen d ukessar, ẓer abrid i ak-yehwan tawiḍ-t, ma d lmeɣreb mazal !Wali kan : “saḥa fṭurek” ɣef 8, tasebḥit deg wlelli ; imawen fuḥen, ɣurek ad taẓeḍ ; allen cuffent ugarent iɛebbḍan ; ḥed ur yettruẓ di nnmara-s, am nnmara n uzrem deg lkanun ; ma d imennuɣen, la ttnaɣen ɣef uqerruy n tsegnit ; … ayyur akk n remḍan akka, kra yekka wass d aya ara tettmagareḍ. Ssbeḥ deg ubrid, win temlaleḍ, imal yiṭij-is. Yeddumbes wudem-is seg ɛawaz. Allen-is d aṭṭiwen am iɛeqquren-nni n umqerqur usuki. Tanzarin-is ɣunjrent, keɛbubcent seg lfuḥa n yimawen. Leɛyaḍ-is yugar win n wuccanen yeskibbiɛen s ṭul n yiḍ. Ma d taglimt-is tekkusem seg urɣu n wussan-a. Ad tessaleḍ kan imir : « leɛnaya-k ! d remḍan, ur iyi-sefqaɛ ara », « nɛel cciṭan ahhh…, d remḍan ! », « ɛni yeɣleb-ik remḍan ». Lḥasun, izzayriyen, deg wussan-a n remḍan, d les AGM : Algérien Génétiquement Modifié. Ikumersiyen, iɛedda uwtul deg cclaḍa, d yir rrbeḥ i d-yewwḍen ! Kulci yesserbaḥ, yerna zwaren ɣur-s wid yettḥerqisen leɛyun-nsen, wid yezgan daxel lğameɛ. At icumar ṭṭfen leswaq, sezwarayen “salam uɛlikum”, seggrayen “ncallah”. Γur-sen, kulci yettnuz, daɣen les AGM kulci ttaɣen-t. Meɛna, akken qqaren At zik : “anagar wid ixeddmen tiqurar i irebḥen deg wayyur n remḍan.” Ma deg lbiruwat n tedbelt (administration), kulci iteddu dudac dudac, xmat xmat. D askerker ay skerkiren ass, ttkerwinen ɣef wulac, tettali legrina seg uɣamac. Leɛqel yezwar lmeɛqul, yerna d aḥbib n Rebbi, xersum imi i aɣ-t-id-ğğan waɛraben “kul ɛeṭṭla fiha ṣṣalḥa.” Anef-as i AGM ad yettiɛqir s leɛqaqer n remḍan ! Akka ara yekk akk wayyur-a, meɛna ad yuɣal. Ma d ilemẓiyen, qqaren-ak : « deg remḍan kan i nezmer ad nwali tiḥdayin i icebḥen s tidet imi ur ttmakiyint ara ! » Meɛna, mazal la tberren ddunit deg remḍan. Yal yiwen d akken yella iɣill akken yakk medden !

Dj. Ikhloufi

source:dépêche de kabylie

Publié dans tamazight(65) | Pas de Commentaire »

1234
 

The Soul of a Slayer |
AHL EL KSAR |
toutelactualite |
Unblog.fr | Annuaire | Signaler un abus | Halliburton Manufacturing &...
| Le Tallud 79200
| momema